Bangladesh atanga Mizoram chhunga dan lova foreigner lo lutte thawnhaw an nih theih nan hmalak ni rawh se

Press Statement

Dated Aizawl, the 24th January, 2018: MZP rorelna sangber MZP Assembly in a lo rel tawh ‘Bangladesh atanga Mizoram chhunga dan lova foreigner lo lutte thawnhaw an nih theih nan hmalak ni rawh se’ tih angin Bangladesh atanga foreigner lo lo lut te chungchang chu bawhzui zel a ni a. Chakma zawng zawng hi MZP chuan a haw lo a, dan lo a Mizoram a lo lut foreigner leh a ram neitu Zofate chanvo min chuhpui tute hi a hua in, kan rama lo lut foreigner te an chunga action lak a nih theih nan nasa lehzuala hmalak kan tum mek a ni.

MZP in hma kan lak mek lai hian New Khojoysuri khua Lunglei District ah Chakma chhungkua pakhat Lokhi Ranjan te chu Bangladesh atanga lo lut foreigner Mizoram khua leh tui nih tumin Voter I’D te, ration card te, Tribal certificate leh birth certificate te an dil tih hriat a ni a. An Sakhaw Puithiam ah te tangin Mizoram khua leh tui nihna neih tumin nasa takin a bei a ni. Hei hi hriain MZP Sub Headquarters Tlabung te chuan ni 18th December 2017 khan Tlabung Police Station ah First information Report(FIR) an thehlut a, FIR hi police te pawhin bawhzui nghal in ni 19th December 2017 khan Lokhi Ranjan Chakma foreigner hi man tumin New Khojoysuri khuaah hian an kal a, amaherawhchu Lokhi Ranjon hi an Mandir-ah lo dah in an Sakhaw Puithiam te leh khawtlang mipui ten nasa taka an lo hum avangin Police te chuan buaina lianzawk a chhuah hlauin an man ngam rih lo a, an haw san leh ta rih a, Mizoram Police ten Chakma zirlaite thlavang hauhin Mizo zirlaite thisen chhuak hial khawpin kut an thlak laia dan lo a Mizorama awm Lokhi Ranjan an man ngam lo hi MZP chuan na a ti hle a ni. Police te hian hemi hnu hian bawhzui zelin verification te tiin Lokhi Ranjan hi foreigner a ni ngei a ni tih finfiah a ni a. Foreigner a ni ngei a ni tih finfiah a nih hnu pawh hian Police lam chuan man mai lo in Tlabung SDPO chuan ni 4th January 2018 khan Lunglei Chief Judicial Magistrate hnenah criminal complain a thehluh ta a, Ni 22nd January 2018 khan court chuan thuhretute ko in, FIR thehluh atanga ni 36 na ah Foreigner Act 1946 section 14 hmanga thubuai ziah luh a ni ta a ni.

Hemi chungchanga MZP zawhna chu Lokhi Ranjan New Khojoysuri a khawsa mek hi Bangladesh atanga Mizoram a inbengbel tum foreigner ngei a ni tih finfiah thlap tawh si hi engvangin nge Mizoram Police te hian an man mai loh? tih hi a ni. Lokhi Ranjon New Khojoysuri a mi Mizoram a inbengbel tum foreigner a ni tih finfiah thlap tawh hi ni 31st January 2018 ralhma ngei a man a, dan anga a chunga hremna pe turin leh an ram Bangladesh a thawn haw thuai turin MZP chuan thuneitute kan ngen a ni. Ni 31st January 2018 ralhma a Foreigner Lokhi Ranjon hi man a nih loh chuan man a nih theih nan hma kan la dawn a, huntiam chhunga man a nih loh chuan a man tur leh an ram Bangladesh a thawnhaw turin Mizo Thalai ten ke kan pen chhuak dawn a ni.

Bangladesh atangin foreigner an rawn lut nasa a, hei hi Mizo mipui ten kan vei em em laiin Sorkar ber hian a vei lo niin MZP chuan a hria a, theihtawp chhuaha kan nawr chung pawhin hmasawnna tak tak kan hmu thei lo hi pawi kan ti a. Kan thenawm Assam hian an state-a dan lova luta khawsa foreigner-te hnawhchhuah an tum mek a, chumi atan chuan khua leh tui chhinchhiah hna thawkin National Register of Citizens hna an thawk mek a ni. Assam chuan Bangladesh pian kum 1971-a an state-a awm hmante leh an thlahte chu khua leh tuia chhiar an tum a. Chuta lang ve lote chu foreigner an ni dawn ta a, an Chief Minister meuhin an list siama lang lote’n fundamental rights an neih loh tur thu leh vote pawh an neih loh tur thu a sawi hian MZP chu a tirualawt hle a ni. Assam State-in an state chhunga foreigner hnawhchhuah hna a thawk dawn a, Assam State khua leh tui ni ve lo foreigner-te chu himna zawngin an vak ang tih a rinawm avangin kan thenawm state-te chuan an state-ah an luh loh nan tan an la mek a, kan state hi kan muthlu bik ang tih MZP chuan kan hlau a, Assam atanga foreigner-te rawn luh theihna tur luhkate veng turin kan ngenin kan phut a ni.

Tin, Sorkar laipui (Ministry of home affairs) chuan foreigner-te chunga dan anga action la turin India ram state tin sorkarte August ni 8, 2017-ah khan a lo hriattir tawh a. Hemi kawngah hian kan state sorkar hian hma a la tha tawk lo hle in MZP chuan kan hria a, ram hruai hna an chelh chhan chu hetiang te hi a ni tih hriaa chak taka hma la turin Mizoram sorkar thuneitute kan ngen a ni.

Issue by:
Mizo Zirlai Pawl(MZP)
General Headquarters : Aizawl.

NO COMMENTS

Leave a Reply

This site uses Akismet to reduce spam. Learn how your comment data is processed.