Mizoram-a chhunga Assam Police duty post awm dem

Dated Aizawl, the 3rd March, 2018: March ni 2, 2018-ah Assam-in Mizoram chhungah hna rawn thawka police duty post an rawn siam hi MZP chuan na a ti a, hetianga kan ram chhunga an rawn che hi MZP chuan a dem hle a ni.

Assam sorkarin hna an rawn thawhna hi Mizoram chhung, Mizoram chief minister hmasa ber Pu Ch Chhunga ram (leilet) a ni a, Assam-in he’ng lai vel hi Mizoram a chuh tlat avanga ram hauh nana Pu Ch Chhunga(L) nupui Pi Lalrothangi’n MZP hnena a pek ram niin, MZP chuan Assam-in min chuhpui loh phah beiseiin February ni 27 khan he hmunah hian Zofate Chawlhbuk a sa nghe nghe. He Chawlhbuk hi Assam sorkarin an \hiat nghal a, chu mai ni lovin police awmna tur hmun an sa zui a ni.

Chief minister hmasa ber te chhungkua leh MZP chuan he’ng lam ram hi Mizoram chhung kan ti a, mahni rama hna thawk turin sorkar dang hnena dil a tul loh avangin Pu Ch Chhunga(L) te chhung hian leiletah hna an thawh dawnin Assam sorkar hnenah an dil ngai lo a, MZP pawhin Zofate Chawlhbuk sak dawnin Assam sorkar hnenah engmah a thlen lo. Mizoram sorkar hian Mizoram chhungah a chhiar ve em tih hi MZP zawhna a ni. A ram chhungah a chhiar ve a nih chuan pawi tia na ti ve turin MZP chuan Mizoram sorkar a beisei a ni.

Mizoram chhungah Assam-in hna an rawn thawk hi Mizo mipui tawh phawt chuan na an tih MZP chuan a ring a, chutih laia Mizoram sorkar a ngawi reng mai leh Zofate Chawlhbuk Assam-in an thiah thu-ah te pawh engmah hre lo ang maia Mizoram sorkar a awm hi hi MZP chuan pawi a tiin a dem tak zet a ni.

Ramri buaina vei tur leh ram hauhva tang turin MZP chuan sorkar a ngen a, Bairabi dai vel leh hmun danga harsatna awmte hi ngaihtuaha chinfel tum turin a ngen bawk. Tuna thil duhawm lo thlenna hmun vela Assam-in sikul an dinte leh police outpost an neihte bakah Assam lamin huan an rawn siamte hi ngaimawha chhuahtir turin MZP chuan Mizoram sorkar a phut a, thuneitute’n an mutthluksan reng a nih chuan Mizo \halaite’n an tih tur an ti ang.

Ram min chuhtu Assam lama theihtawp chhuahtute hi an zirlai pawlte emaw an tlawmngai pawlte emaw ni lovin sorkar a ni a, chuta an kut leh ke ber chu police an ni tih leh a rualawhthlak hle a ni tih hi Mizoram sorkar hian hria se MZP chuan a duh a ni.

Zofate Chawlhbuk din tawhna, Assam sorkarin \hiata police duty post an dinnaah hian MZP chuan Zofate Chawlhbuk din leh ngei a tum a, he ram hi Mizote ta a ni tih a puang nawn leh e.

(LALNUNMAWIA PAUTU)
General Secretary

Leave a Reply

Your email address will not be published. Required fields are marked *

This site uses Akismet to reduce spam. Learn how your comment data is processed.

Zofate chawlbuk sak hnatlang nei

MZP in Zoram Ni hmang