Mizoram leh Assam State ramri chungchang seminar neih a ni

Dated Aizawl, the 20th. February, 2018: Vawiin chhun dar 12:00 khan MZP Conference Hall, MZP Pisapui-ah Mizoram leh Assam State ramri chungchang seminar neih a ni a, Seminar hi Pu B. Vanlaltana Vice President-in kaihruaiin, Pu F.Ngurbiakvela Joint Action Committee On Inner Line Reserve Forest Demand Mizoram Chairman chuan paper a present a ni. Tin, he hunah hian Bairabi khua a MZP in Zofate Chawlhbuk sakna hmun tur ram petu Ex-Chief Minister Pu Ch. Chhunga(L) nupui Pi Lalrothangi Saron Veng Aizawl hnenah lawmthu sawina thuziak hlan a ni a, Pi Lalrothangi hian thusawina a nei bawk a ni.

He huna thusawi tu L. Ramdinliana Renthlei President chuan, “Tuna kan ram chin ni a kan ngaih zawng zawng hi neih let vek duh tawh lo zawk anga hnamdang an tam lutuk kan luah seng chuang lo tih ngaihdan nei kan Thalai te leh ram vei inti te zingah pawh kan tam sawt ta hle a. He ngaihdan hi ngaihdan tha lo tak a ni. Kan ram a nih chuan a enkawl dan tur leh a tih dan tur chu a ram neituten kan rel ve mai ang. He ngaihdan hi Mizo Thalai te atangin emaw kan ram vei tute atanga pawhin awm tawh lo se, tumah hian sawi tawh lo ila ka duh a ni.” a ti.

L. Ramdinliana Renthlei chuan, “Kan Pi leh Pu ten an thlah kal zel turte chenna atana an lo sah zau tawh leh an lo enkawl tawh te tun dinhmuna mi ram ang hiala ngaih a lo ni ta leh, neih let leh theih tawh lo ang hiala Thalaite rilruah a pilbo hret hret chu pawi ka ti hle a, kan State ramri chuangchangah hian thangtharte leh Zoram mipuite kaihharh leh thudik hriattir a, chawh nuna an awm theih nan hmalak kan tum a. Hmalakna hmasa atan ni 27th February,2018 hian Pu Ch.Chhunga(L) Ex-Chief Minister huan/leilet Bairabi khua-ah Zofate Chawlhbuk kan sa dawn a ni.” a ti bawk.

Mizoram state leh Assam state ramri chungchang Seminar ah hian political party hrang hrang MPCC, MNF, MPC, ZNP, BJP, ZPM, PRISM Party te an tel a. Political party te bakah hian NGO aiawh leh heti lama tuimi thahnem tak an kal khawm a, sawiho hun tha tak hman a ni bawk.

He huna kal khawm Political party hrang hrang leh NGO hrang hrang te chuan a hnuaia mi ang hian Resolution an pass a ni.

  1. Inner Line Forest Reserve Sq. Miles 509 Assam Sorkar in a enkawl mek hi Mizoram sorkar in a enkawl ve tawh a laklet a nih theih nan hmalak ni rawh se.
  2. Kan pi leh Pute atanga kan rochun kan ram hi humhima, humhalh tlat a nih theih nan hma lak ni se la, kan ram humhalh leh humhima hma kan laknaah pawl leh political party te tanrual tlat thin ni rawh se.

(LALNUNMAWIA PAUTU)
General Secretary

NO COMMENTS

Leave a Reply

This site uses Akismet to reduce spam. Learn how your comment data is processed.