MZP bultumin faina hnatlang

Dated Aizawl, the 5th February, 2018: Tukin ni 5th February, 2018 (Thawhtanni) zing dar 7:30 khan MZP General Headquarters leh 46th Assam Rifles tang kawp chuan India rampum a faina beihpui thlak mekah, New Market Area tihfai hnatlang neih a ni a. Hnatlang tan hma hian inkhawmna tawi neih niin, Tv. L. Ramdinliana Renthlei, President MZP, 46th Assam Rifles Commandant Pratush Kumar Sing Gaur leh Dawrpui Local Council Member Pi Zosangzuali ten thu an sawi a ni.

Tv. L. Ramdinliana Renthlei, President MZP chuan “India rampumah faina beihpui thlak mek a ni a, hemi kawngah hian Mizo zirlai te pawh hian mawh kan phur ve a, tha kan lo thawh ve a, kan ram a lo fai zawk nan a theihtawp chhuah hi kan tih tur a ni. Fai hi hi hriselna a ni a, kan bawlhhlawh paih kawngah te Mizo mipuite kan fimkhur a ngai hle a, bawlhhlawh te hi a paihna tura an ruahman ah chiah paihna tura an ruahman ah chiah chiah paih thin turin zirlaite leh Mizo mipuite kan sawm che u ani” a ti.

46th Assam Rifles Commandant Pratush Kumar Sing Gaur pawhin thu sawiin, Faina hi hriselna atan a pawimawh thu leh hmasawnna atan thil pawimawh hmasa ber a nih thu sawiin, MZP nen hetiang hun an hmangho thei chu lawmawm a tih thu leh nakin zelah pawh MZP te nen hmalak ho zel a duh thu a sawi.

Dawrpui Local Council member Pi Zosangzuali pawhin, “Aizawl khawpui laili leh mipui veivah tamna Bazar hmunpui tihfai leh vawn thianghlim kawngah MZP leh 46th Assam Rifles tangkawp ten kut an rawn thlak hi a ropui em em a. Bazar hmangtu mipui tu te pawhin bawlhhlawlh paih kawngah fimkhur in, vawn thianghlim hi kan mawhphurhna a ni tih kan hriat ka duh a ni”, a ti bawk. He faina beihpui hnatlangah hian sikul engemaw zat atangin sikul naupang thahnem tak an tel a ni.

MZP leh 46th Assam Rifles te chuan Ni 20th January, 2018 khan Joint meeting neiin kawng hrang hranga MZP te nen thawhho dan tur an rel a. Tunah hian hmachhawp engemaw zat neiin Hindi Spoken Class kalpui mek a ni a, tun thla chhung hian zirlai te tan familiarisation Tour nei tur a hmalak mek a ni bawk.

(LALNUNMAWIA PAUTU)
General Secretary

NO COMMENTS

Leave a Reply

This site uses Akismet to reduce spam. Learn how your comment data is processed.