MZP hruaitu thar ten charge in hlan thar

Aizawl, the 31st October, 2017: Vawin ni 31st October 2017 hian MZP chuan kum2015-2017 chhunga MZP hruaitu te leh kum 2017-2019 hruaitu thar ten MZP Conference hall MZP Pisapui ah chanvo inhlanna kan nei a, he hun hi Adviser Lalhruaitluanga Chawngte in a kaihruaiin, Pu Lalsangzuala Ngente President kal chhuak leh Tv. Ramdinliana Renthlei President thar ten thusawina an nei a ni.

He huna thusawitu MZP President thar Tv L. Ramdinliana Renthlei chuan, “Kum 2012 atanga khan mzp chuan kan ramah hlemhletna leh eirukna nasa tak do anih theih nan leh a hlawhtlin theih nan Lokayukta chak tak din a nih theih nan hma a lo la tawh thin a, Mizoram Sawwrkar ah pawh vawi tamtak thlen ni tawh chu tun thlenga la hlawhtling lo chu a hlawhtlin a hman vat nih theih nan mzp chuan hma a la dawn a, Sorkar thuneitute pawh Mizoram ah Lokayukta din a nih thuai theih nana hma la turin ka ngen nghal bawk a ni.”a ti a.

L. Ramdinliana Renthlei chuan, “Zirlai pawl kan nih angin zirna kan ngai pawimawh dawn a, Mizoram zirna in hma a sawwn theih nan theihtawp MZP in a chhuah zel dawn a ni. Mizoram Sawrkar enkawl Zirnain In hrang hrang a bikin Primary school leh Midle school ah zirtirtu awm mumal lo leh indaih loh na school thahnem tak vawiin thleng a awm hi pawi kan ti tak zet a. Zirnain a bikin thingtlang lam ah zirna In ten zirtirtu an neih zirna mumal loh chhan chu zirtirtu tlem vang ni lo in zirtirtu awm sa semrual loh vang a niin ka ngai a, hei pawi ka tiin hriathiam har ka ti hle a. Zirnain a bik in Primary leh midle-a zirtirtu nei lo leh zirtirtu awm mumal loh na school ten mumal tak a zirna an kal pui thei nan hmalak kan la dawn a ni.” a ti bawk.

L. Ramdinliana Renthlei chuan, “Chakma zawng zawng hi MZP chuan kan haw lo a, Dan dik lova ramdang atanga lo lut foreigner te hi kan hua a ni. Central sorkar in India ram state tinte bawhzui turin mahni awmna state a foreigner te zawng chhuaka enfiah turin order a chhuah tawh a, he order hi kan state Mizoram hian bawhzuina a nei miah lo hi hriatthiam har ka ti a. Mizoram state sorkar thuneitu ten he order awmsa hi an bawhzui theih nan MZP chuan hma a la dawn a ni. MZP hian a din tirh atanga zirlaite leh ram leh hnam tan hma a la thin a, zirlaite leh ram leh hnam tan chuan kuang lo a nei lova theihtawpin hma a la chhunzawm zel dawn a ni.”a ti bawk.

L. Ramdinliana Renthlei chuan Zofate kan in suihkhawm a, lungrual tak a kan kal zel hi kan ngai pawimawh dawn a zofa hmun hrang hrang a kan inpumkhat that chuan khawvel ah hnam zaawm leh ropui kan lo ni dawn a ni . Zofate kan dinkhaw chhuah nan kan insuikhawm a ngai a kan insuihkhawm theih nan MZP chuan hma ala chhunzawm zel dawn a ni a ti bawk.

(LALNUNMAWIA PAUTU)
General Secretary

NO COMMENTS

Leave a Reply

This site uses Akismet to reduce spam. Learn how your comment data is processed.