MZP in mi chhuanawm chawimawi

Dated Aizawl, the 21th November, 2017: Vawiin ni 21th November, 2017 (Thawhlehni) chhun Dar 12:00 khan MZP chuan MZP chhungkua, University/college S.U, Hnampual hruaitu Under-17 World Cup player leh MZP hruaitu hlui Minister of State chawimawina hun Aizawl Press Club-ah an hmang. He hunah hian Pu K.S Thanga; Minister of State, Mizoram chu khuallian niin Pu B. Vanlaltana; Vice President-in programme a kaihruaia ni.

He huna khuallian Pu K.S Thanga Minister of State chuan “Hnam anga kan lansarha mawi taka kan par chhuahna tur chuan discipline kan zawm a ngai a. Ram leh hnam humhalhna tha ber chu zirnaa hmasawn a ni. Zofate zingah hna sang leh lian enkawl tura IAS tling kan neih mumal tawh loh hle a, Mizote hi hnam ropui tak ni turin Pathianin min din a. Amaherawh chu, kan tih tur leh tih loh turah hmaihthelh kan la nei thin. He kan hmaihthelh hi kan hriat fuh hunah chuan hnam ropui tak kan la ni dawn a ni,”a ti a. “Hengte avanga Zofate kan thangharh lo a nih chuan engtik niah emaw chuan Zoram hian hun harsa kan la tawk ang a, chung huna inchhir leh buaina kan tawh loh nan zirlaite hian nasa zawka thiamna tak tak nei tura kan beih a ngai a ni,” a ti bawk.

He huna thusawitu L.Ramdinliana Renthlei MZP President chuan, “Mizo te hian chawimawi tur dik kan hriat a, ngaihsan tur dik te pawh kan hriat a ngai a, zirlai titha te, Mizo ti hmingtha tute chawimawi hi kan tih tur a ni a, heng mite hi kan ngaisang tur a ni. Lalengmawia World cup player hi MZP chuan kan lawmpui hle a, a hming hi Mizo football history ah a dai tawh ngai dawn lo a ni. India in World cup kan thlen avangin Indian player ten world cup an khel ve thei a, a lawmawm hle a ni. State hrang hrang atangin player kan thawhchhuak hlawm a, Mizoram state pawhin pakhat vawiina kan chawimawi tur Lalengmawia hi kan thawh ve a ni. State dangin an state atanga world cup player te an ngai hlu hle a. State sorkar ang te in chawimawina sum fai te an pek lai a, Mizoram sorkarin Mizo tlangval world cup football khel hmasa ber Lalengmawia a chawimawi thiam tawk lo hi a pawi hle in ka hria a ni.”a ti.

L.Ramdinliana Renthlei chuan, “Tunlaiin mi thenkhatin 8th Schedule-a Mizo tawng telh an duh thu an sawi thin a, 8th Schedule-a a awm loh vanga he tawng hi him lo riau anga sawi te an awm thin. MZP ngaihdanah chuan Duhlian tawng hmasawnna leh himna hi 8th Schedule-a a tel leh tel lohvah ni lovin a neitute-ah a innghat zawk ni. Mizo/Duhlian tawng hi hmasawn se, him se kan tih rualin Zofate tawng dangte dinhmun pawh ngaihtuah tel a ngai a ni. Kan Zo hnahthlak tawng dangte hi MZP chuan a ral ang tih a hlau em em a, Zofate zingah Duhlian tawng ni lo tawng dang ral se ti an awm tlat a, tawng dang hi ral se, Duhlian tawng hmang ve se tih hi insuihkhawmna tur emaw ti tlat kan mithiamte leh ram hruaitute zingah ngei pawh an awm tlat mai hi MZP chuan lungchhiatthlak a ti hle a ni. Chutiang ngaihdan chu Duhlian tawng hmang lote nawr hlatu/hnawtkiangtu a nih avangin he ngaihdan hi mi tin hriat theih tura sawi fo lo turin MZP chuan a ngen a ni. Mizo tawng hi thang se, Zofa chipeng dang tawng pawh hi thang se tih hi kan ngaihdan a ni a, Zofa chipeng tawng dangin hma a sawn poh leh Duhlian/Mizo tawng hian a chhawr ang tih pawh MZP ngaihdan a ni.” a ti bawk.

L.Ramdinliana Renthlei chuan, tun Mizoram State Assembly thutkhawm ah khan kan Home Minister chuan ram dang atanga Mizorama lo pem lut an awm hriat a ni lo tiin zawhna a chhang a. Hei hi official record atanga a chhan a nih hmel a, MZP chuan kan pawm lo a ni. Mizorama Chakma pun chak dan population kan en hian inthlah pun vang a ni thei lo a, ram dang atanga dan lo a Mizorama lo pemlut an awm ngei tih erawh hi chu Mizoram mipuite hian min hriatpui se kan duh khawp mai, a ti bawk.

He huna chawimawi Pu KS. Thanga Minister of State leh Lalengmawia Under 17 World Cup player-te hi Thuziak(Citation) leh Thangchhuah Diar MZP chuan a hlan a ni.

(LALNUNMAWIA PAUTU)
General Secretary

NO COMMENTS

Leave a Reply

This site uses Akismet to reduce spam. Learn how your comment data is processed.