MZP in MPSC form man to ti

Dated Aizawl, the 31st January, 2018: MZP leh Mizoram Public Service Commission(MPSC) thuneitute Ni 5 January, 2018 a Joint meeting-in a rel bawhzuina kal zelah MPSC hnuaia hna dilna application form Rs. 270/- ni thin chu Rs. 150/- a tih hniam a ni.

MZP General Headquaters Executive meeting-in Ni.28 November,2017 a a lo rel tawh bawhzui a. MPSC hnuaia hna dilna application form manto lutuk tihniam tura ziaka lo ngen tawh angin, Dt.5 January 2018 khan MPSC thu neitute nen Joint meeting neih ho a ni a, he hunah hian MPSC thuneitute chuan Application form tihto chhan a nih leh anmahni thu maia tih hniam nghal a harsat thute sawiho a inkawmna hun neih a ni.

Sorkar lam hotuten budget tam tak an tuk vang a ni tih leh, hmundang atanga budget tlakna tur sum tuakna an neih loh avangin application form man chu tih to loh theih loh anih thute chu MPSC thuneitute chuan MZP hruaitute lo hrilhin, MZP ten Mizo thalai hna zawng mekte leh a bikin thingtlang lam miharsa zawkte dinhmun thlir chunga application form tihniam tura Sorkar leh MPSC thuneitute a phut leh an ngenna chu an hriatthiampui thu leh Sorkar lama thuneitu zawkte hnena an lo thlen tur thu an lo tiam angin, Application form tih hniam a lo ni ta hi MZP chuan lawmawm a ti a, MPSC member leh sorkar thuneitute chungah lawmthu a sawi tak meuh meuh a ni.

Tin, MZP chuan Sorkarin zirlaite hmakhua ngaia MPSC budget tuk tawh lo turin leh tun aia application form man pawh ti hniam leh turin angen nghal bawk a. He tih rual hian MPSC kaltlang leh hnalak reng rengah a thiam leh tling chiah la a dik taka hnalak a nih a, MPSC chu Mizo thalai hna zawng mekte tan belhtlak leh rintlak ni turin MZP chuan MPSC member te leh Sorkar thuneitute a ngen thar leh nghal bawk a ni.

(LALNUNMAWIA PAUTU)
General Secretary

Leave a Reply

Your email address will not be published. Required fields are marked *

This site uses Akismet to reduce spam. Learn how your comment data is processed.

MZP in Pu A Zakia lawmpui

MZP bultumin faina hnatlang