MZP in Zofate chawlbuk sak rel

Dated Aizawl, the 16th February, 2018: Vawiin 16th February 2018(Zirtawpni) hian MZP executive committee meeting neih a ni a, meeting hi L.Ramdinliana Renthlei President in a kaihruai a ni. Meetingah hian kum 2018-a Mizoram Quota-a technical course hrang hrang zirtur thlan chungchang te, HSLC leh HSSLC chungchang te leh Zofate Chawlhbuk sak chungchangte rel a ni.

Meeting chuan kan hma lawk a Examination pawimawh tak tak HSLC leh HSSLC lo thleng turah zirlaiten tha tak leh tluang taka Exam an hmachhawn theih nan exam hun chhung power supply hnianghnar zawk pechhuak turin Sawrkar thuneitute a ngen a, tin, zirlaite lehkha zir ti bahlah thei zawnga ri bengchheng siam lo tur leh harsatna siam lo turin MZP chuan mitinte a ngen bawk a ni. Mizo Zirlai Pawl(MZP) chuan Exam hrang hrang hmachhawn tur zirlaite chu thahnemngai tak leh ram leh hnam nghahfak an nih in hre reng chung a an zirlai te zir a exam hmachhawn turin a chah a ni.

MZP Meeting chuan Mizoram Quota-a Technical Course hrang hrang exam a lo hun leh dawn ta a, Technical Course hrang hrang zirtur thlan chungchangah dan hman mek-a categoty-I a tel tur hrilhfiahna- Indigenous people of the state of Mizoram a tih chungchangah a dinna ngaiah MZP chu a la ding reng a ni. Hun hmasa lama Technical Cousre zir tur hrang hrang thlanna ah a ram leilung fa nilo category-I ah dah a ni thin a, kum 2018 ah hi chuan a ram leilung fa nilo chu Category-I a dah tawh lo turin thuneitute MZP kan ngen lawk a ni.

Mizote chanvo hi a ram leilung fa Mizote ngeiin kan chan zel theih nan MZP chuan a theihtawpin hma a la chhunzawm zel dawn a, kan chanvo min chhuhluih tum hnamdang an awm a nih chuan an chungah engpawh thleng se MZP in mawh a phur dawn lo a ni. Kum 2018-a Technical Course zirtur thlan chungchangah MZP chuan hnam rilru pu ran chunga ruahmanna siam turin thuneitute a ngen nghal bawk a ni.

Tin, meeting chuan Bairabi khua-a Pu Ch. Chhunga(L) Ex-Chief Minister Mizoram huan/leilet-ah Zofate Chawlbuk chu ni 27th February 2018 hian sak nise tiin a rel bawk a ni.

(LALNUNMAWIA PAUTU)
General Secretary

Leave a Reply

Your email address will not be published. Required fields are marked *

MZP buatsaihin Hindi Spoken free Class neih mek a ni

Integration tour zilaite tan buatsaih