MZP Library hawng

Dated Aizawl, the 14th December, 2017: Vawiin 14th December, 2017 chhun dar 12 hian MZP General Headquarters chuan MZP Library hawnna hun leh Mizo tlangval pahnih National Defence Academy-a in ziak tlingte lawmpuina hun MZP Conference Hall-ah a hmang a, he hunah hian Pu R. Lalzirliana, Home Minister chuan Khuallian leh hawngtu niin hun a hmanpui a, he hun hi Pu B. Vanlaltana, Vice President MZP chuan a kaihruai a; Lalnunmawia Pautu, General Secretary chuan Library sak a nih dan report pein inhmelhriattirna a nei nghal a ni. Tin, he hunah hian L. Ramdinliana Renthlei, President MZP chuan thu a sawi bawk a ni.

He huna thusawitu L. Ramdinliana Renthlei MZP President chuan, “MZP in Library tha tak kan nei ta hi a lawmawm hle a, MZP Library hi zirlai ten tangkai taka kan hman theih turin buatsaih tum a ni. Tunlai hunah IAS, IPS, Central Services, Army/Navy/Airforce officer-ah Mizo tling kan awm ta mang lo a, hetih laia National Defence Academy(NDA) a lut tur Mizo zirlai pahnih kan nei hi a lawmawm hle a, MZP chuan kan chhuang takzet a ni. Central Service-a Mizo thalai tam zawk kan luh theih hi a pawimawh khawp mai a; Central service-a Mizo thalai tam zawk kan luh theih nana nasa lehzualin kan beih tlan a ngai a ni. Mizo zirlaite hi Central Service-ah thahnem tak kan luh a, zirna a hnamdang te kan khum hi kan ram leh hnam kan humhalh nan hna pawimawh tak kan thawk a ni tih kan hriat thar a pawimawh hle a ni.”a ti a.

L. Ramdinliana Renthlei chuan CADC Area-a Chakma khaw hrang hrang MZP in a tlawhkual chungchang sawiin, “Chakma Council Area khaw thahnem takah hian Christian te hmuhsitna leh vauna a nasa hle a, Chakma Council Area-ah hian Mizo te tan In leh lo neih theih a ni lo a, kan missionary ten Biakin leh Quarters atana ram an hawh pawh hnawk an ti tan tawh hle a ni. Christian te hnenah, ‘Christian atangin bang ula Council atangin development kan pe ang che u, Christian in nih chuan development kan pe lo ang che u,’ an ti a. Khaw pakhat kan tlawhna KURBALASORA khuaah phei chuan kan Missionary chuan in luah tur a hnawng a, In luah tur a hmuh loh avangin Biakin an chenchilh tawp nghe nghe a ni. Christian ram, Mizoramah ngei Christian ten hmuhsit leh endawng leh vau kan tawk hi a na kan ti hle a, kan Missionary ten Christian rama Zalen taka rawng an bawl thei lo hi a pawi kan ti hle a ni. Christian ram, Mizoram-ah Christian ten hmuhsit leh vau an tawh loh nan leh kan Missionary ten zalen taka rawng an bawl theih nan kan thiam leh theih ang tawkin MZP chuan hmalak kan tum a ni,” a ti bawk.

(ROTHANLIANA)
Secretary i/c Publicity

NO COMMENTS

Leave a Reply

This site uses Akismet to reduce spam. Learn how your comment data is processed.