MZP ten hnamdang dan lova awm dapchhuah runpui nei

Dated Aizawl, the 18th November, 2017: Vawiin 18th November, 2017(inrinni) khan MZP bultumin Mizoram hmun hrang hrangah hnamdang dan lova khawsa (Inner Line Permit neilo) leh Mizoram state chhunga dan lo leh permit nei lova sumdawngte dapchhuah hnatlang neih a ni a, ILP nei lo Mizoram pumah mi 150 chuang leh dan lova sumdawng mi 20 chuang hmuhchhuah niin thuneitute kutah hlan nghal an ni.

Sorkar leh thuneitute pawhin theih tawp chhuaha hma an lak mek lai a, vawikhat hnatlanna a hnamdang permit nei lova khawsa leh dan lova sumdawng thahnem tak manchhuah tur an awm leh Hnamdang kum tling lova hnathawk kan ram chhungah an tam ta lutuk hi MZP chuan pawi a ti hle a, heng hnamdang dan lova khawsa te hi permit neilo bakah anmahni leh anmahni lo in sponsor te leh hnamdang vekin an lo sponsor te an ni hlawm a ni. MZP in hnamdang Inner Line Permit(ILP) nei lo a dapchhuah kawngah dan lova Mizorama awm Mizo vekin an thlavang an lo hauh thin chu pawi a ti hle a, hnamdang Inner Line Permit(ILP) nei lo te chu an thlavang lo hauh tawh lo turin Mizo mipuite kan ngen nghal bawk a ni.

MZP chuan India danpuiin a bik taka min humhalhna dan Inner Line Permit(ILP) hi a nihna ang taka hmang tur leh a pekchhuah dan chungchangah pawh fimkhur leh zuala kalpui turin thuneitute a ngen nghal a ni. Mizoram puma dan lova hnamdang khawsa te dapchhuah hnatlangah hian MZP hruaitute bakah College hrang hrang Students Union(SU) Leader te leh Hnampual Zirlai Pawl hrang hrang hruaitu mi thahnem tak an thawkchhuak a. Tin, MZP chuan hnamdang dan lova khawsa a hmuhchhuah te chungchang chu ngun takin a enzui dawn a, thawn kir (push back) an nih dan pawh MZP chuan Vairengte thleng a umzui dawn bawk.

MZP chuan Mizoram chhung a dan lova hnamdang awm Inner Line Permit nei lo te, hnamdang sumdawngte leh Mizo hming hawh a sumdawngte dapchhuakin a tul angin hma a la chhunzawm zel dawn a, hnamdang dan lova sumdawngte dapchhuah kawngah hian MZP chuan Mizo mipuite thlawpna a ngen a. Dan lo a hnamdang sumdawngte hi an sumdawnna tihtawp anih theih nan MZP chuan hmalak zel a tum a, hnamdang dan lova sumdawngte chungchanga hmalakna tithuanawp zawng leh hnamdang thlavang lo hauh lo turin MZP chuan Mizo mipuite a ngen a ni.

(ROTHANLIANA)
Secretary i/c Publicity

NO COMMENTS

Leave a Reply

This site uses Akismet to reduce spam. Learn how your comment data is processed.